Le źene kaj sas řobur ande l’ KZ-ura taj aśile źuvinde, sas maj but têrne manuš, maškar bišê taj tranda bêršengê. Xurde śavorêngê taj maj phure manušêngê nas prja but šanse te preživin le brutalni logorongê kondicije. Le maj but źene, kaj nakhle źuvindes o genocido, antrego pesko trajo aśile traumatisirime kodolestar so pecisajle. But decenije katar o agor le marimasko sas te nakhên, źi kaj le Řom taj Sinti priznajisajle sar viktimur kata rasističko progono. Le maj but Sinti taj Řom kaj preživisarde o genocido sas te aźukêren but decenije źi kaj dobisarde kompenzacije pala o phanglimos ande l’ logorja, pala lengo xasardo sastimos taj pala sja pesko proprijeteto, so xućildesas lendar.
