F2 O na-akceptirime priznajimos

Ando bêrš 1980 rodja o “Verband Deutscher Sinti“ thaj e „Gesellschaft für bedrohte Völker“ te aven pîterde le dosijejur thaj aktura kata federalno arxivo, kaj kêrde le Hitleroskê raj pe vrjama kata nacionalsocijalizmo pa l’ Řom thaj Sinti. Von rode jek publikaki rehabilitacija le minoritetoski. Ka 4.aprilo 1980 ankêrde deš-u-jek Sinti jek bokhalimasko štrajko, vorta po than kaj sas maj anglal le koncentracijako logoro Dachau. Oxto djes palal dja la bavarijako ministari pala andrune buća peski vorba, te roden pe le dosijejur. Sar rezultato le bokhalimasko štrajkosko primisardja o savezno kancelaro Helmut Schmidt 1982 jek delegacija kata o Zentralrat Deutscher Sinti und Roma kaj formirisajlo sas xancî maj anglal. Ande peski deklaracija priznajisardja o kancelaro Schmidt angluji data o genocido kata 500.000 Sinti taj Řoma obligatorno ando Njamco pala internacionalno oficialno pravo.