E2 Politikaki intervencija

Po 16. decembro 1942 dja o šerutno kata SS, o Heinrich Himmler e porunka, te traden sja le Řomen thaj Sinton, kaj inkê trajinas ando Baro Njamco, ande koncentracijakê thaj mudarimaskê logora. O Oskar Wilhelm Rose, kaj trajilas garades ando njamco xoxavne lilenca, lja ka 4. aprilo 1943 o riziko pe peste thaj rodja jek divano le Michaelosa Faulhaber, savo sas kardinalo ando foro München. Lesko řudjimos karing o kardinalo te kêrel kak intervencija kontra le Řomengê thaj Sintongê deportacije sas ivja, vi te sas le maj but Řom thaj Sinti katolikur. O kardinalo ramosardja ande pesko kalendaro: „Ka sekretaro sas jek Zigeuner, lesko anav Adler, katoliko lo.–Le 14.000 Zigeuner ando Njamco trobul te aven ćidime ande ‘k logoro, kote te aven sterilisirime, e khangêri te kêrel protesto. O Zigeuner rodel vorta manca te maladjol. – Na, naj aźutimos.“