B6 Eugenika

La rasakî teorija savi malavel, kê le Řom taj Sinti rimon o „Genpool“ la evropakê narodongo, kodja teorija formulirisarde angluji data la švajcerskakê psixijatrur. Palal line le nacionalsocialistur lendar kaća teorija opre. Ando bêrš 1905 zumadja te atestiril la švajcerskako psixijatro o Josef Jörger, jek proponento la eugenikako, sar e familija „Zero“ xatam „rimosajli“ anda kodja, kê jek Řomni kata l’ travelerur mêrîtisajli ande kaća familija. Le źenengê, pa save kêrde investigacije, thode kasave nebulozni, subjektivni taj bimalade atributur sar „kurva“, „kriminalno manuš“, „dilo“ taj „bastardo“. Palaj teorija la eugenikakî sî e atituda, sar ponašîl pe jeg manuš, hereditarno, kodja buśel kaj sî ramome ande manušêsko genomo. Anda kodja dine le membrur kata la eugenikako miškimos e rekomandacija, te laśarel pe le narodoski genetično konsistencija „rasengê higenijakê“ metodenca, sar kaj sî kodja sterilizacija pe zor, manušêngê eksperimentonca taj eliminacijasa kata grupe kaj „naj želime“.