C5 Sterilizacija

De kata o bêrš 1933 o „zakono paj prevencija kata genetičko nasvalimos la neva generacijako“ avilo pe zor. Pala kodo zakono sas ando Njamco legalno, murša taj źuvlja te aven zorasa sterilizirime numa te dikhênas len le naci sar biželime elementur la socijetakê, te dikhênas len kaj aśile von mentalni vaj fizični palpale, membrur kata „čořivane rase“ taj takozvani „biande kriminalcur.“ De kata 1933 źi ka 1945 sas maj but de 400.000 źene sterilizirime zorasa – maškar lende sas but Řom taj Sinti. Sas murša taj źuvlja, save sas sterilizirime taj kodolasa sas len šansa te na aven deportirime ande KZ-ura, sas vi avera kaj kêrenas lengê sterilizacija pe zor ande logorja. Kado zakono khoslilo tek ando bêrš 1988, le viktimongê či jeg data či poćinde kompenzacija pala kodja.