G2 Frankfurt

Ando bêrš 1929 vazdja o foro Frankfurt jek logoro pala le lokalni Sinti taj Řom. Le lokalni raj zumade zorase te mêken le Sinti taj Řom peskê khêra anda maškar le forosko taj te munčin pe von ande nevo logoro. But familije, kaj trajinas kata socialno ažutimos le forosko musaj sas te mêken peskê purane bêšîmaskê thana taj sas te trajin von ando lagero tala bilaśe higenijakê kondicije. Ando bêrš 1935 phandadja pe o logoro. De kata o bêrš 1937 trade le Řomen taj Sinton ando Frankfurto ande jek logoro kaj sas ande Dieselstraße. Kote angêrenas vi le Řomen taj Sinton kata antrego Hessen. Kutka kêrdja e "Rassenhygienische Forschungsstelle" kata o Robert Ritter pala o bêrš 1938 perskê testur pe le logoroskê manuša. Bute manušên lendar angêrenas akatar ande l‘ mundarimaskê logorja.