E4 Garudo

Ando majo 1944 organizuisarde le nacionalsocialistur racije ande Holandija, te bi astarenas sja le takozvani „Zigeuner“ taj te deportirin len ande KZ-ura. O Zoni Weisz sas vorta jefta bêršengo, kana xasardja vov peskî antrego familija. Pe vrjama la racijaki nas vov khêre, numa xancî palal astarde vi les taj angêrde les kaj trenoski stanica palaj deportacija. Ali jeg laśo policajco – fajma sas lo jeg membro la resistancako – mêklja les pe paluno momento te našêl peskê taj te garadjol. Amala taj njamur ažutisarde leskê te preživil. Pala marimasko agor studirisardja o Zoni barakî kultura taj avilo jek kata maj prominentni evropakê floristur taj vi jeg ašundo aktivisto po marimos pala le Řomengê taj Sintongê čačimata.