A7 Školako śavořo
O Karl Stojka bijandilo ando bêrš 1931 ande ‘k cîkno gav ando Niederösterreich. Leski familija perel pe Řomengî grupa „Lovara“. Von sas barvale bizničarja kaj ćinenas taj bićinenas grasten. Milaje phirenas von pe la austrijakê regionur Burgenland, Steiermark taj Niederösterreich. Ivende trajinas von ando Beči vaj na dur kata o Beči. Palaj austrijaki okupacija kata l‘ nacionalsocialistur leski familija či tromajli maj but te phirel po milaj, anda kodja aśili permanentno ando Beči. O Karl, leskê trin pheja taj vo peskê phralesa, źanas ande škola ando Beči, kote avile von amala bute laśe źenenca. O oficialno anav leskê dadesko sas Karl Horvath, numa savořê prinźanenas les numa tala anav Wakar. Leska dakê buśelas Sidi Stojka, kana sas voj śejořî, numa butivar hazninas von vi la familjako anav Rigó, kê vi kata kaća bari taj ašundi „Lovarengî“ familija avenas lengê njamur.
