C9 Bućakê logorja
Le anglune deportacije teljarde pala o „Anschluss“ ando bêrš 1938 kana anektirisajli e Austrija kata o Njamcicko „Rajx“. Miji de miji Řoma taj Sinti kataj Austrija xasarde pengê civilni čačimata, deportirisajle ando Njamco ande KZ-ura vaj ande zoraka bućakê logorja aj kote pašê sas bare publikakê projektur te kêrdon, sar pe bare bulhe droma pala l’ vurdona, projektur te ćiden le paja kata l’ řekur pe ‘k than vaj elektrificirijakê projektur. Pe kako dokumento kataj komuna Spitzzicken/Hrvatski Cikljin ando Burgenland sî o anav kata 19 Řom kata kodja komuna ramome taj vi le logorja ande save deportirisajle.
